ניגון משיח

לחן: הרה״ק הדברי שלום מסטראפקוב זצ״ל
מילים: ליפא שמעלצער | לעילא ולעילא (תשס"ד)

אין סטראפקוב דער רבי זינגט זיך א לידעלע,
קענען דאס תנועה'לע עס דארף יעדע אידעלע,
אויף ביאת הגואל גרייטן א סעודה'לע,
לא יום ולא לילה.

פאר משיח זינגען א שירה'לע,
שעפן נחת וועלן מיר פון זיין צורה'לע,
אין בית המקדש דאס הייליגע דירה'לע,
לעילא ולעילא.

אליהו זאגט אונז יוֹם שִׂמְחַתְכֶם,
גרייטס אייך צו משיח'ן, באלד איז ער שוין דא,
הִנֵה הִגִיעַ זְמַן גְאוּלַתְכֶם,
ברוך ברוך הבא.
ברוך הבא בשם השם, ברכנוכם מבית השם.

אהוי! ווי שווער איז אונז די וואג,
פון דאגות וואס מען טראגט,
דאס אידיש הארץ צו דיר אזוי עס שרייט.
אהוי! יעדן טאג און טאג,
געבן מיר א זאג,
אני מאמין ער איז שוין נישט ווייט.

לְכוּ נְרַנְנָה לַה' נָרִיעָה,
דיר באזינגען זאל מען האבן די זכיה.
מיר ווארטן יארן שוין אויף די שעה,
צו זינגען ברוך הבא.
ברוך הבא בשם השם, ברכנוכם מבית השם.

זען תנאים ואמוראים,
אבות ואמהות ברוכים הבאים.
ווערן ריין פון אלע חטאים,
ארויסגיין מַאֲפֵילָה.

ס'קומען אידן מכל המינים,
און פון הארצן גיסן פילע תחנונים,
יעדער צדיק מיט זיינע ניגונים,
לעילא ולעילא.

צַדִיקִים יוֹשְׁבִים בְּעַטְרוֹתֵיהֶם,
נֶהֱנִים מִזִיו הַשְׁכִינָה בִּירוּשָׁלַיִם.
אידן הערט מען דארט בְּקוֹל דְמָמָה,
ברוך ברוך הבא.
ברוך הבא בשם השם, ברכנוכם מבית השם.

אהוי! פאטער, ווי לאנג נאך,
מיט דעם שווערן יאך,
פון דעם גלות מיר ווילן שוין אהיים.
אהוי! ס'גייט דורך וואך נאך וואך,
מ'בעט וִיזַמְרוּן לָךְ,
שִׁירִין וְרַחֲשִׁין בִּירוּשָׁלֵים.

ויהי בישורון מלך,
צוזאמען מיט משיח'ן גיי מיר פאמעלעך,
ווען בקרוב הנה זה בא,
לעילא ולעילא.
ברוך הבא בשם השם, ברכנוכם מבית השם.